Tuesday, June 24, 2008
屎都滾…
明明係快樂o既宵夜活動，明明係預祝我生日，就偏偏要俾我知道……
一班行坐落，自然會交流近況，包括自己、同事、公司…而近期最 hit 係以親戚關係空降o既新「主筆」。佢兩蚊八我一早都知，唔理出面個個傳佢兩蚊半，我認定佢係兩蚊八架喇！唔合理就預左，邊個叫佢入行先過人又有人照﹖
點知一問起佢入行幾耐，有個同佢同期舊同事即爆，話佢中五畢業！我當堂屎都滾埋！中五就出來做野，佢究竟有冇好好讀過書，佢張cert有冇三科合格架﹖兩蚊八﹖
我學士學位，人工連佢一半都冇，某君碩士畢業，人工仲少我幾舊…乜野世界呀﹖！
加上佢每日寫一單，仲要收工先有貨交，腦細 D 氣要我地幫佢骾，條數點都計唔到出來！
雖然有朋友話呢行係咁，又有人話「路遙知馬力」，不過我諗我唔知可以忍到幾時唔爆…我真係唔接受學識同人工一o的都掛唔到勾。
為左唔好繼續同佢襯，我都係想辦法盡快行開。
Wednesday, April 30, 2008
笑話‧一與二
《陸先生》
主持人：「接下來下一個。」
稿單上寫著類似的東西：「XX市場兩名素有積怨的檔販，一天開檔時相遇又因小事爭執，其中一人向對方指罵：『陸柒，開你個檔啦！』繼而變成打架收場…」
某君：「佢係咪姓陸架﹖」
……結局係點已經唔重要
《幾多歲》
主持人：「有兩個十七歲o靚仔，未夠砰，想搏大霧入去一個要滿十八歲先至可以入o既場……，結果被保安捉到趕番出來，dispute…」
某君：「果兩個o靚仔幾多歲話﹖」
主持人：「十七歲…啊……」
千真萬確呢…某君似乎對「幾多歲」同「佢姓乜」情有「毒」中，最日準時食藥，點都要問過先至安落…試過有人姪佢：「頭先咪講左o羅！你有冇留心聽﹖」結果佢即時扯火：「你咪響度同我阿支阿gor！我而家唔係問你私人野！我係問緊你公事呀！如果我問你私人野你可以唔答我……（下刪，太長）」好大條道理呢…
我都好想開次會睇下，凌死都要錄音！
Saturday, April 12, 2008
電影節過後失落症候群
今年國際電影節已經圓滿結束兼且曲終人散，而我每年例牌都會失落一番。
以前睇電影節，睇到好戲（好劇本、好導演、好演員、好橋、好提材、好畫面、好音樂…）就哽係開心啦，睇到一D自己覺得唔鍾意o既片，都算叫做「有過經驗」，睇驗過下人地所謂「實驗」電影…之類之類。完左電影節，會好似冇野好做咁，望穿秋水想快D到下一年。
近年睇電影節，未睇晒已經開始失落，好戲少左咩，唔係，只係新思想少左，商業多左，好多戲電影節睇完，轉個頭原來佢會響香港上……絕對係買貴左飛（電影節我有左折都要$54，去戲院我買四十幾蚊咋）！
我揀戲果時都已經好小心，先走晒港產片、台灣片、大陸片，港產片擺到明會上番，台灣同大陸就一定買得番（DVD都仲可能平過入場睇戲），英美日只揀奇情怪雞，大製作一定唔睇等佢上，其他外國片先至按個人喜好揀……籂左一輪，都仲係失落……今年我睇左十四齣，只有一齣《玩十誡》我係預左佢上，諗住先睹為快，點知跟手就有幾齣會上…包括：《警察樂隊來訪時》（因為佢康城參展大讚）同《華麗安琪兒》（因為法國大導拍英文=因為佢係英文），連《小心有牙》都好似會上……！嗚！好失落呀！
不過，今年都有得着，一向記唔到（更加分唔到邊個打邊個）導演o既我，居然睇番一個自己曾經好鍾意o既導演（編埋）o既戲！我以後都會記住佢！如果佢有一日話退休（九成唔會），或者去左，我諗電影節一定會同佢整個大師回顧，到時我諗我唔撈都會去睇。我正在想辦法買佢最出名果套系列。佢係Eric Rohmer。
Saturday, March 22, 2008
電影節開鑼喇！
同以往一樣，電影節買飛完全係憑書仔裏面個介紹同埋幅「劇照」（幅劇照唔一定真係劇照，可能只係海報o既其中一個剪角…），再加上自己想像力（通常都會非常主觀同片面，並經常走火入魔），每年都有被騙，但每次都依然上當，不過已經有方法可以將中伏率減至逾來逾低。
一連睇左兩日，有少少中伏，不過都尚算OK。短評會加響上個post個介紹下面，有興趣可以睇下。
Saturday, March 15, 2008
電影節
一年一度國際電影節，我亦都一年一度直到有promotion先至會醒起，假期已經定左，都睇到十幾齣，算唔錯架喇！今年亦都同以往一樣，套套戲都買多張（有部份買多幾張），睇下邊個有興趣一齊去睇。因為忙左幾日又病左幾日，都唔得閒搵腳，趁而家未訓得著賣下廣告先。唔係想懶，但由於官方網頁設計唔方便抄錄，所以要大家自己連過去睇。另外，我三月之內買飛都仲有九折，都可以幫下手，除左開幕閉幕之外，其他都係free seating的。
警察樂隊來訪時 20 mar 19:45 Grand Cinema
滿座，其他場次仲有 我冇飛喇
講真我從來未了解過以‧埃局勢，不過「異地兩族溫情片」幾吸引。
淡淡然的一齣戲，不是很有戲味，也不像介紹中的有人情味。帶出了，政治大慨只是搞政治的人會關注，小民眾都只關心自己的問題，自己和身邊的人的關係也難搞，還幹嘛去理遙遠那方的種族問題﹖可看指數：2.5（政治因素沒計算在內）（5為最高）
全然大丈夫 21 mar 12:45 大會堂 三級
滿座，其他場次仲有 我現成有一張飛
我鍾意日本怪雞片，木材佳乃都幾合我眼緣。
是小品一齣，愛情片是也。蠻好看的，但香港一定不會上映。可看指數：3.5（短評後補）
水母人間 21 mar 18:00 Grand Cinema
滿座，其他場次仲有 我現成有兩張飛
以色列講唔同楷層人性人格，究竟同我地又一唔一樣﹖
也是淡淡然的一齣戲。可看指數：3.5（短評後補）
小心有牙 21 mar 23:45 朗豪坊 三級
滿座，其他場次仲有 我九成同男友去，除非佢好冇與趣睇。
電影介紹暗示主角係雙性人，凈係呢樣已經想睇，仲要放響「鬼故」呢個項目…早知就買多幾張飛啦！
美國片就是美國片，就是什麼都可以，但沒有大美國元素只有藝術家做得到。因為之前自己走火入魔，錯估劇情，但什麼都沒有進場反而會更加好看好玩！「格劍」場面欠奉，原來真係有牙！（短評在電影節後補上）可看指數：4.5（有0.5分是感觀分）
世界動畫精選（一） 24 mar 10:30 文化中心
滿座，其他場次居然仲有 我自私，冇買多張飛，早知就買爆佢再放出去炒黃牛啦！
揀佢，無他，習慣來的。
我估（二）會好睇D。可看指數：3
華麗安琪兒 27 mar 19:15 Grand Cinema
滿座 我冇飛喇，不過其他場次仲有飛。
一聽個名「華麗」我已經心動，再睇係法國片，即時扑鎚！
故事很直接地描寫安琪兒的一生，她是一個天才，只可惜出身低下的她只願意看到美麗的東西，成名後將自己所有不是美麗的過去都刪改，甚至連自己母親的過去亦然……成功為她帶來了錢和愛人，性格讓她眾叛親離，也失去了愛情。……可看指數：3.5（想詳細地寫一下，後補。）
格拉斯十二樂章 27 mar 21:30 文化中心
仲有飛 我現成有一張
講音樂人，又可以偷睇人地私生活，o岩我。
沒有劇情，只是看一看有名的作曲家、配樂師在以前和現在過著什麼樣的生活，也蠻好看的。可看指數：3.5
生死分流 30 mar 15:00 太空館
仲有飛 我有一張飛，男友訂左喇
講無國界醫生o既紀錄片，對我來講係新嘗試（我好少睇呢類片）。
說是回憶錄比較貼切，說著個諾貝爾和平獎得主從返舊地，探望舊人，回數著舊事；如今拍攝著同一個地方，穿插著過去的片段。可看指數：3.5
小男生的愛與性 30 mar 18:00 大會堂
滿座，但仲有一場有飛 我有一張飛，男友訂左喇
算係商業片架喇，想睇係因為鍾意「L」。
看了就知松山研一為什麼是「L」，揀佢，係有原因。不錯，如果你有時間又不介意花的話…（短評後補）可看指數：4（有0.5分是因為我喜歡這個故事）
儘管如此我沒做過 30 mar 21:00 大會堂
滿座，會展果場仲有飛，但係我冇折 我有一張飛，男友訂左喇
日本痴漢事件，自稱冤枉卻被拉上法庭，我好想知個結局。
是很用心拍的一齣電影，很細心詳細地解釋著日本的司法程序，說著很多「為什麼」。故事很寫實，結局亦很寫實（起碼按劇中「設定」的日本人是寫實的，但我還未清楚日本人是什麼樣的一種人）可看指數：4
牧羊人之戀 03 apr 19:15 文化中心
我就冇飛喇，不過票房仲有飛。
五世紀、牧羊人、仙女、爭仔…呢齣戲我第一眼睇過劇照裏面D戲服就剔左喇！
導演ERIC ROHMER，今年88歲，將這齣愛情片怕成了一齣笑片。故事說愛會至死不渝、會絕對專重…十七世紀寫五世紀的愛情故事，說愛，是有一點偏激，那點偏激變作今天的荒謬，導演將它拍得一本正經，那是很美麗、很純的愛情；有一點像看舞台劇，十分「戲劇性」，不過你就讓舊時的人那樣單純罷；對不起，牧羊人沒有放浪、仙女不會法術，也沒有爭仔場面，不過幽默的地方好笑、到肉的地方會緊張，結局是突如其來的「就係咁簡單」，愛情，就係咁簡單！我之前看過他另一齣自編自導的愛情喜劇Conte d'automne（秋天的故事/ Autumn Tale），也是很值得看的，都值得收藏！可看指數：4.5
怕黑怪談 04 apr 10:30 大會堂
仲有飛 我現成有一張（小安，妳有興趣嗎﹖）
法國黑白卡通，講真唔o岩細路睇，偏偏要早場，但係好在佢有早場我先至睇得到！
玩十誡 05 apr 18:00 大會堂
場場都滿座 我仲有一張飛（小安，妳有飛架喇！）
我算係無神主意，百無禁忌，夠胆拿十誡出來玩，係美國人先至得！
慾孽巴黎 05 apr 21:00 文化中心 三級
仲有飛 我現成有兩張（小安，妳都有飛架喇！）
慾孽同巴黎，開正我果飯，仲要係文化中心上，即係「大片」，唔可以唔揀！
其他推介（個人口味）
七個角色尋找卜戴倫（八成百老匯有得上）、偽術大師（八成百老匯有得上）、尋她千百度（有心機搵可以買到碟）、翠絲的碎片人生、日式牛仔一品鍋、記住我：青蜥魔、如果‧愛在寶萊塢（有心機搵可以買到碟）、請投我一票（希望可以買到碟）、 Lagerfeld機密檔案、一奏傾情（四月頭上）、魔鬼大狀、春風吹到布拉格、二度處女go go go……太多…以上好多都滿座，不過應該有好幾齣會再響香港上。
病入膏肓
好耐冇整理呢度，因為病，真病。
平日傷風感冒，流下鼻水，我係唔會理，之但係有一日起身周身骨痛又頭暈，我就知道係唔理唔得o既時候。
第一日睇醫生都仲係好小事，佢仲笑我喉嚨生左粒菲滋。跟住，一直都過住「食野‧食藥‧訓」o既生活。到第三日，喉嚨冇好到仲痛左，洗完個面照照鏡，塊面白過Cate Blanchett，覆診果時醫生都O咀。佢話我喉嚨多左好多一點點白色、爛晒、含膿，叫我如果再腫D就去急症室喎；最後出張醫生紙話我急性扁朓線炎。又如是者「食野‧食藥‧訓」。今日第四日，訓到而家食左藥都訓唔著喇。
呢幾日打破左好幾個自己o既紀錄：
訓得最多‧每日最多只有八個鐘係唔響張床。
連續最耐唔沖涼‧四十七個鐘啦，都未夠兩日，冇街去就懶啦，牙有擦o既。
有一整日冇踏出過屋企‧連倒垃圾同行出露台都冇。
最勤力食藥‧自從自己決定睇唔睇醫生開始，第一次咁勤力食藥。
我咁乖唔係因為怕死，係怕行出街一個唔該咳得太過份，俾個「好心人」打電話叫白車送左我入醫院；我怕遇到唔pro同唔溫柔o既護士。
Saturday, March 01, 2008
脫貧之世紀婚宴‧進行及事後篇（一）
講下講下，脫貧西o既婚宴話咁快就到左，亦都話咁快就過埋，認真笑料一籮籮！唔係吹水，佢今次搞結婚搞出來o既笑料，唔夠寫一本書都夠大家講一年半載！認真要分幾集寫！又由於佢太多搞笑野，個個都係重點，一時間都唔知點落筆好，咁就等我用短篇o既形式同大家分享啦！
「訂酒會定係自助餐﹖」
脫貧西之前明明講話九至十一cocktail，之後行禮，後來又話，簽完紙之後「再book多一個時間」，直落三點就食lunch buffet，之但係張帖印住「十一點行禮」，然後就係自助午餐，九至十一個cocktail呢﹖
其實，當佢講話訂酒店搞西式果時，大家都諗住脫貧西份人咁縮骨唔會搞到咁大，同埋帖都未印好就要人confirm去唔去，一定有D野…有口痕友話佢一定未訂場，係睇住人數先至落訂！我口臭，加一把咀話佢一定會將朝早cocktail訂左o既食物放落中午個buffet度
！呢樣聽落好衰，之但係又唔係講唔通喎！因為據有關酒店網頁資料，佢有三個戶外場：大、中、細，可訂單邊或組合，有代辦證婚人服務，除左可以訂全套服務，網頁亦有明諭暗示可以散訂：自助餐套餐價要120位或以上，幾款價錢（但佢有細場，應該可以散頂自助餐），訂酒會的話可以按個人心水揀唔同食物配落去，食乜野、幾多份量自己話事，咁o既話，酒店個做法極可能係可以分場租同食物兩個價收；而有人話酒店搞西式好多都可以一個禮拜前先至預訂。咁多客觀證據，脫貧西極有可能係如大家所講：知道朝早冇人會來，只訂中午，個自助午餐就睇住人頭訂。
我向有到場人士求證過，大龍蝦、生蠔、鵝肝、有個廚師挏響度同你切燒牛肉…全部久奉，佢地記得食過o既「貴野」有：青口、細細隻龍蝦仔（我問過個樣，應該係淡水龍蝦仔，真係大頭蝦都貴過佢）、魚生（我諗只得一盆，事關遲左半個鐘去o既人已經連隻碟都見唔到）、炒飯同「好多款」甜品（之但係冇人答得出有邊幾樣）…等等，飲品係各式汽水同獅威啤酒（全港最濺價啤酒之一
），紅酒、白酒、汽酒同香賓全冇。據聞現場有五張大台，只有三張坐滿（其中一台係同事+行家），換句說話，只有大約三十幾人，連埋「早走果幾個」（有人話「好多人」，仲講得出人地個名，但係呢幾個人偏偏冇其他人見過，都可以算係真有其人掛…），算有四十人，但係有人話佢訂左六十位，今次蝕硬啦，不過脫貧西事後似乎都冇牙痛咁聲，我估佢呢餐係女方俾錢。（你話我黑心都係咁話）
Thursday, February 14, 2008
情人節（送給有她的你）
祝大家情人節快樂！
「有情人o既你……未有情人o既你……」呢類說話，電視、roadshow、電台、報紙…都有得出賣，我唔想講咁多廢話。
有環保機構調查女仔情人節想唔想收花，都多餘！呢個並唔係想唔想o既問題，係開心唔開心o既問題。
送花有幾唔環保﹖包裝唔環保﹖送盆栽都一樣會有人包得靚靚，有盆泥仲要加個袋載住添！剪D花出來唔環保﹖咁就要去搵番邊個發明種D花出來然後再剪出來賣果位。好多花係生完可以再生，有少部份係只生一次出籽之後成棵會謝，點解唔可以剪出來賣﹖如果唔識種，送盆栽直頭未開到花就謝啦……問題係膠袋﹖唔係。問題係香港呢個咁文明o既地方都仲未有好完善o既分類回收同環保產品意識。邊個唔識分開紙、膠、玻璃、金屬、餸汁…﹖我屋企出面垃圾站咁大地方，都冇回收箱。電池咁細，點解凈係回收手機電池﹖膠袋好貴咩﹖點解唔限定用自然分解膠袋、其他可再造膠類只用作某幾類用途令回收成本減低﹖就算膠袋呢個習慣改唔到，咁可唔可以教人點樣分開來掉﹖我唔信香港人學唔識，亦唔信新移民係文盲。冇環保渠道，點講環保﹖
講講下離左題添！我想講「開唔開心」o既問題。有邊個女仔收到花唔開心﹖不過送花除左講心意同誠意之外，真係要講體面。唔理係平日送定係節日送，大有大送，小有小送，視乎荷包而定，包膠又好、包紙又好、包禾杆草都好，總之要包得好好睇睇，又或者有少少心思，收果個就點都會覺得係獨一無二（除非佢只係愛你個荷包唔係愛你，咁又另當別論），如果只係好似拜山咁一個透明膠套套住，咁你一係先上去對方屋企插得好好睇，一係真係留番拜山先至送，因為唔理佢愛唔愛你都好，十個有九個見到都唔想要，如果係節日就寫包單十個有十個都唔想要之餘你仲要面對分手o既下場。
收花係面子來架！以前D人唔多出街，花就當然係愛o既表現，我冇話而家唔係，之但係而家人人日日都出街，花就多左重身份——就好似衫一樣係個人o既表現。所以，想送花的話，都係包得佢靚靚咁送啦，雖然大、小、花種（你當然唔可以求其到送劍蘭同白菊啦！）、係咪名牌子…係有比較，但係鍾意你的 話點都係心甜，有幾何會響街度撞到舊情人（舊情敵）佢束花大束D兼且仲走過來單單打打丫﹖真係撞到咁你一係認命一係鬧贏佢啦！
另外，如果節日/生日送的話，我本人認為，有花但係冇禮物，你不如唔好送花；花貴唔送花可以理解，但係買得起花又唔買禮物真係點都講唔通。收花係開心，但係冇紀念價值；去醫院探病可以送花，去見你偶像都可以送花，但係病人同探病o既人都唔會諗住「紀念入院」，你偶像更加唔會紀念你睇過佢演唱會，但你同你情人就一定希望以後都一齊（起碼果一刻係），有件實物有個紀念，就有回憶就有回味，所以禮物先行，有花冇禮物絕對係一個缺陷。
最後而又最重要o既論點係：男仔要主動氹同愛錫女仔架！男女之間o既事，係冇得講男女平等！你諗下：男人識唔識生仔﹖男人夢遺洗乾凈就等如冇野，點解女人M來要痛﹖男人包皮可以劣來劣去，點解女人塊膜穿左就冇﹖男人唔著衫冇問題，女人著低胸咁多人望﹖……
所以，男士們，afford得起就買束花啦；afford唔起又或者買唔切就唔好夾硬喇，響其他地方努力下啦。
脫貧之世紀婚宴
上回講到脫貧西擺酒，帖都未有，原來佢先派行家，點解要先派行家，偕因佢識唔識、有兩句冇兩句都派帖，佢本身番中更，連人地早更行家都派埋，佢都幾有諗頭喎，諗住十蚊換人地三舊，以為可以好似某大聲前同事一樣，周圍發帖就會收到禮﹖當年大聲擺酒有人一兩舊就去食餐，佢以為而十家D人會識做﹖佢邊位﹖平時同大家有幾好朋友﹖二月十日最消息，敵集團有兩行家會到。
呢兩日終於都見到佢響公司派帖，分批每日派十張八張，近排嘈過交o既唔駛收帖，早前嘈過下又自問冇幾句都照有得收，只差真係唔熟果班每日響度諗緊點推佢，同埋每日都聽到「你有冇收到﹖」…但可以肯定o既係：未有人話會去，而所有人都話只會收到帖先至做人情，夾埋買份禮物俾佢，有人話只想夾五十蚊，亦有人話佢派帖都唔夾…。我提議買燒烤爐，咁大家終於可以有藉口上佢屋企玩，而我亦可以托佢地幫我搵番失落左o既CD，唔失禮，大家都有得著
。
小記會繼續為大家貼身報導事件進展。
Tuesday, February 05, 2008
結婚=脫貧
公司條死矮仔話說冇晒本地菜受佢打友宜波之後，轉戰北上，上「徵婚網」搵女，雖然上得網好o既多都預左只係搵下伴，未必係好認真，但係大陸女仔都唔係蠢，都會諗住你搵得佢做女友點都有D著數，少少花費哽唔少得，點知條友只係存心呃西屌，少少著數都冇放低，唔駛幾耐就俾人唱到臭晒，要改過第二個網名先至可以再識到人。又俾佢咁好彩識到條本地菜，物以類聚搞埋一齊。
根據見過真人o既朋友講，條女屬中女，唔靚又冇身材，講野又大聲，離左婚，有個十六歲仔仔，似乎撈偏，包括帶電子零件（走私）。就叫住佢「偏偏姐」先。
話說偏偏姐有次帶貨衰左，冇做（冇得做、唔敢做…總之係冇做野），矮仔就拍心口話養佢喎，咁人地有十幾萬積蓄，賣埋層樓收左幾十萬（其實冇人知個實數），就疊埋心水做少奶奶，某日兩口子「講開」卡數問題，矮仔攤開晒D單，一計成十幾萬，偏偏姐二話不說同佢找晒（只係找晒有單果D，仲有好幾張單都仲係寄去我屋企，未找架！當然有人唔敢再同偏偏姐講，D單又仍然未改過…）十七萬幾（有人話廿萬），同時間就傳出佢地結婚o既消息（結婚就有錢收，明晒！）。
起初，矮仔仲話只係簽紙，叫人來觀禮得喇，後來又走去影左結婚相…好不富貴。上個月，傳聞矮仔聽到接連幾個同事擺酒都有錢賺，佢又話搞大佢，同班同事行家講，話開結婚開酒會，一定要到！黃金海岸，朝頭早九至十一！嘩，個個聽到都話「實去到」啦！過左幾日，見大家冇乜反應，又話訂埋中午個 section，食 lunch buffet 喎。突然富貴背後，有人鬼拍後尾寢，話結左婚之後，偏偏姐會買架車俾佢，Benz來架，三十萬架！咁大家就明晒……
佢個婚禮，真係有殺錯冇放過，叫同事不特只，行家無論有兩句冇兩句、有電話冇電話都照請，仲同人講「我訂個自助餐每位成四百幾蚊，西式公價七百架！」又問某行家到時幫手影相「拿，禮你照做，之後我封番封利是俾你！」嘩，人地「友情價」都未同你開聲喎！結果，反應更係好好啦！擺中午，返工果班都唔知飲唔飲佢杯香賓好……
大家見矮仔咁有誠意，就著手諗結婚禮物：有人提意，一人夾十幾廿蚊，上大陸買一批汽車用品，等佢買新車時有用；又有人話，買電毯或者壓力煲……不過，而家仲有三個星期都唔夠，大家開始估佢會將cocktail小食放響中午當係buffet o既時候，連帖都仲未見過喎！
呢單野，俾玻璃房笑匠聽到，某日同矮仔前老友——大隻同事（新郎哥）講電話講開，好羡慕咁話：「佢就好啦，咁就脫貧喇！」
自始，我地同矮仔改左個新花名——脫貧西。（點解有個西字﹖因為行家每個人個花名最尾都有呢個字，規矩來架！）
臨門一差一腳…
賽事：脫貧西 vs HEN先生
時間：上星期六
地點：電話線上（玻璃房 - 街外某處）
實力：轉數低對智障，贏面一半一半。
【綜合各方面消息‧消化後報導】話說當晚有單巴士意外，HEN先生打電話搵脫貧西幫莊，有好多傷者咁話，叫佢去醫院做，點知流料，脫貧西即時打電話返玻璃房，狂鬧HEN先生，HEN先生冇佢咁好氣收左佢線，有人唔份氣，再打電話上來，一有人聽就狂講粗口，誰知聽電話果個係月巴師奶，佢唔知係驚得滯定嬲得滯，即刻同腦細講，差不多時間，脫貧西未鬧到HEN先生條氣仲未順，再打電話來，HEN先生接，當然又再被人狂鬧，有人仲話一定「DUP實你」云云，又誰知有人咁醒錄左音，（半推半就咁）話好驚、要報警喎！
當時腦細輩只有A君同C君番工，兩個都唔識做和事老，件事就唔知點解去左WEEWEE壺果度，搞大左，……，仲話要炒人咁話，當晚照肺，HEN先生放工由特工組護送返屋企。
第二日，兩個接電話事主同班經手腦細都咁o岩放假，只有脫窮西番工，聽講佢笠水笠到呢…我都好想睇下…我地有幾個事不關己的身痕友就玩左一日，開心左一日！
休戰一日之後，今日返工再次照肺，今次由（算）最識得人情世故o既老細（辜且仲可以叫聲佢「老細」）B君上場，A君監場，要脫貧同HEN先生要脫貧同三口六面講清楚…中間講過乜，只有佢地幾個知，我只係見到脫西黑晒口面咁行出房，其餘三個繼續談心，夜後，兩條腦細又再孖HEN先生談多一次心……但係都係冇人知搞成點。
食飯時候，B君突然走埋來，我都知佢無事不登三寶殿——佢問我上次A君同C君搵我談心係咪錄左音，又問我會唔會事後又「返屋企再錄來錄去呀…妳都知o岩o岩有件麻煩野同錄音有關啦，所以希望妳唔好再搞佢嘞（叫我唔好搞多劑咁上下啦），因為而家呢件事都未搞得掂…」我求其「哦」左一句就算。（哼，我多謝佢提醒我添！）
換句說話講，即係HEN先生仲未放生脫貧西，「脫貧計劃」仲有希望！
但係大圍預期，最後會打個和，因為一來唔夠人，二來脫貧西之前剛剛造到個勢，令某D冇用腦o既人睇落，佢好似好有料咁。
賽事目前由HEN先生小勝，但兩邊都有支持者：
出去跑班同事撲來撲去其實好辛苦，果晚仲落雨添，坐玻璃房班友都唔體諒下。
「好多傷者」唔會空穴來風，叫左多幾架白車來，班傷者未見過世面，現場包紥好又突然唔想再俾一百蚊睇醫生，好閒啫，而且巴士意外一向都預佢多人架啦！HEN先生成日周圍點起火頭。HEN先生目前主要只係做接電話同打電話，其實好多決定都係後面有人話事，當然同人嘈交都通常係佢啦。收流料之後，打上來嘈下係咪唔得﹖嘈下邊個冇﹖投訴都大把！之但係連續不停打電話勁爆粗狂鬧仲要話打人就真係冇贏面。
我本人支持HEN先生，點解﹖因為脫貧西=死矮仔lor！
Friday, February 01, 2008
《長江7號》
周星馳，是一個名字，等同一個牌子，幾乎等於一個保證，接近一個信仰。曾幾何是看周星馳是想爆笑一番，不經不覺間，現在入場時變成有種期待。
言而，今次有一點失望。
故事簡單得可以，窮得可以的兩父子，兒子因為窮被欺負，卻沒有因為窮而特別勤奮，遇上外星狗，幫過一些忙（救人一命算是幫大忙了），但最後也還是窮得可以的父子。可能是一心想讓電影變成 I 級合家歡（個人意見：可惜因為學生打交一幕，和巨人女同學角色，變成IIB），結構來得有點單薄。
我看早場$35，還沒有界櫈。
《聲夢奇緣》August Rush
一個人去1看這齣戲，因為那天一個人，因為到戲院之後即時可以入場不用等……因為喜歡那主角童星Freddie Highmore，因為童星長大後就不是童星，因為童星不趁他還未長大看日後他或會退色。
這齣戲的劇本極盡老套：一見鍾情、一夜情大肚、家庭反對、母子分離、自我放棄、不離不棄、千里尋親、絕世天才、奇人奇遇、陰差陽錯、相見不知、奇蹟重逢……。盡是黑白粵語片的橋段，但不代表這齣戲不可取，因為新意在於角色、在於情節。
故事說，一個搖滾歌手與上古典大提琴美女，一夜之後再無緣見面，但珠胎已暗結，一次意外，孩子被搶走送到孤兒院；孩子因身懷天才而得古怪性格，一次無意出走，遇上新潮拐子佬，天才被發掘，又因一次走失，才華被公告天下，最後老公終於搵到老婆，阿媽終於搵到阿仔作結。兩小時沒有冷場，劇情幕幕緊接，感人但沒有催淚。不是大片但一定是好戲。幸好Freddie只是長高還沒變聲……
Tuesday, January 29, 2008
《王苑之國語創作專輯》
一天聽電台，主持人說這CD在台灣很好賣，而聽過「你是我最愛的人」之後，雖然沒有留心聽亦沒有把整首歌聽完，但副歌那幾句旋律就是一直纏繞在心裏。之後，就自自然然走到唱片店，看到價錢滿合理，架上又所餘無幾，就買下來了，算是自己的新年禮物。
對王苑之可以說是幾乎一無所知，以前只聽過她最紅的兩首歌，聽過這張CD後，才知道她的歌聲是如此多變，（不知是否因為在台灣製作和唱國語的關係）一個沒留心，就聽到陳綺貞、楊丞琳、范曉萱和王菲，最後唱廣東話的就聽到容祖兒……但是之間又到處有一些王苑之的聲底。
唱片整體是很用心機的製作，作曲全由王苑之一手包辦，大部分詞亦自她手筆，其他的代筆亦看得出他自己的思想（需然有些比較抽象和主觀），是張很有盛意的唱片。（又不知是否因為在台灣製作的關係），總覺得編曲和錄音比香港製作的唱片更細緻。
唱片的風格看坊間碟評就好了，不想在這裏寫，因為不喜歡重重複複的，好像在炒襲一樣。
就一寫一寫我聽著唱片時的感覺罷。唱片前半都是愉快的曲詞，很放鬆，但到「（第6首）你是我最愛的人」就突然變得很沉重，那是相逢恨晚最後還是不可以在一起的故事，它雖然跟自己的故事不盡相同，但感覺就好像在看到自己的悲劇故事一樣，就忍不住哭出來了。雖然接著的一首歌很輕快，跟著一首很舒情，還是好不起來，令第9首聽起來就像在自己在發大白日夢一樣，後來的兩首更一首是痴等一首是失戀，那個時候，看到怎麼東西都是沒有顏色的。到bonus三首歌，一首說著對一段關係的失望，另一首更是三角戀受害者…直到最後一首「格格不入的」教會詩歌，才讓我可以脫離那怨氣。
這是一張值得收藏的CD。
Tuesday, January 08, 2008
過新年
新年剛過，看到友人寫下一年的回顧。我懶，也怕回頭看，所以不寫了。
既然好的壞的都已過去，就寫一下新一年的展望罷。
我希望家裏的雜物有地方收好，可以隨時讓朋友上來玩。
我希望工作穩定，可以持續令債務減少。
我希望可以找到不太差的工作，可以讓我繼續兼職。
我希望電腦不要太快壞掉，可以延遲付錢買新的日子。
我希望每日早點起床，可以有時間練琴。
我希望東西不要再貴下去，可以多省點錢。
我希望皮膚可以好一點，可以讓我繼續扮「廿字頭」。
我希望男朋友不用找會自己來。
……
我奢望花仔和BB可以乖乖地讓我剪指甲。
我奢望中六合彩。
我奢望學生會乖乖練琴。
我奢望學生家長不要一時三刻要請假。
我奢望學生愈來愈多。
我奢望在公司不要再見到腦細和擦鞋仔。
我奢望自己坐位的電腦可以上網。
我奢望肚腩消失、身材變好。
……
丟失了
丟失了好一會，是因為電腦某部份出了問題，不是經常可以開機；也因為人某部份出了問題，不是常常有衝動動筆。
丟失的，希望在日後可以補回。
Friday, December 21, 2007
Slava's ShowShow
昨天去看了，貴是貴了一點，但很精彩啊！遲一下實寫看後感，先給大家看看完場時的氣氛！
影片暫時上不到，先看相片！
這裏是第一層觀眾席，你看到的所有球狀物體，完場時全部彈出觀眾席，全人類參與（只限第一層觀眾），不是在玩球，就是在玩雪（滿場都被灑滿紙碎），還有大到足夠蓋住十幾個座位的大球，因為被觀眾們推上半空，所以沒拍到入鏡，小丑們（主角例外）都出來陪大家玩，又可以拍照，沒有帶相機（只得手機）的我不停喊「蝕」！
Sunday, December 16, 2007
《弱智上司》
我有一個上司，佢每日返工都唔知做乜……唔用「弱智」，都幾難搵到第二個詞語形容……
返工第一件事，有title人開會收料，人地完完整整講左一次個故仔，時地人事清清楚楚，到「句號位」要講第二單果時，偏偏佢又問番「單野幾點架﹖」「邊度發生話﹖」「個時主幾大﹖」「乜野武器﹖」…結果報料人要講兩次……
跟住開始搵寫手寫稿，佢又一時三刻突然改變主意、改變方向、一胆十二腳……搞到個個同事條氣都唔順，佢條友仲聲大夾惡，一開口鬧就話人唔肯做野，都唔知佢係有心想外邊D高層以為我地真係唔想做，定係佢根本諗唔到第二句鬧人……
到人地終於起好段稿(s)，佢審稿，又要寫手或旁邊某上司再詳細解釋多一次個故仔……結果當然效率其低啦，某某上司仲爆料，話有某人曾經對弱智上司講，叫佢唔好寫稿同唔駛審稿……
佢慢、蠢、冇記性…都算數，最慘係成日帶鑊氣俾人孭……有一次個同事撮頭返來，都講左人撮佢撮，唔肯定張相係唔係，弱智上司死都話要去馬，結果真係錯o既，個同事記左個污點（雖然佢都有唔少污點），某日就突然間消失左……
又有一次佢突然收到D寫手收唔到o既料，係咁叫寫手開出事地點個公司名，寫手覺得可疑死都唔肯加，當晚弱智上司夾埋某位撐佢o既高層響部電腦面前密密傾，夾埋擦老細鞋，出公司名之外仲出埋間公司集團個主席名（某主席同老細係仇家），當然人地公關部即時來找誨氣！弱智上司被問罪，佢就不停咁「追查」邊個報間公司名出來，當然冇人認啦，最後屈左一個低級職員，炒左，而弱智上司o既上一級就被人話冇管理好下屬，被扣左兩日假期，而弱智上司呢，高層話佢要負責任，不過等人地公司寄左封律師/投訴信來，先至同佢算帳，結果，人地公司大人有大量，都費事浪費律師費，冇動靜，弱智上司o既處分就不了了之……
自始，大家由「憎佢」變成「睇唔起佢」。
而我就作左首詩俾佢：
有個上司，低能弱智；
明明係廢，死撐有計；
滿口廢話，亂發爛渣；
呀支呀gor，自封大哥。
放左響電腦做screen saver，每待機一分鐘就不停咁碌出來。
後面仲加左句，送o既：
面係人地俾，架就自己丟。
Saturday, December 15, 2007
絕交的原因
上一個post講過我兩個朋友同前前男友（即係生得都幾矮、浪費左我年幾青春、搬走左唔向銀行改地址、欠落週身債、搞到我成日收到佢D追數信同追數電話、我當年搬去同佢住蝕左萬幾蚊但係佢搬走又問我拿番幾千蚊按金上期果個，上次已經恭喜過佢，都唔想同佢再有拉拎，以後就叫佢矮仔啦）絕左交，就等我同大家交待一下事件經過。
事主係剛剛擺酒搵我做司儀o既同事，同埋我另一個司儀拍擋，就稱呼佢地新郎哥同男司儀啦。
新郎哥其實同老婆住埋好耐，擺酒禮節又要做足，之前一晚要唔見面，可能係新奶奶屋企唔夠位（我估啦，真正原因冇問過），所以就向矮仔借間屋做男家，同男司儀去佢屋企休息一晚。新郎哥個幾兩個月前就問左，矮仔都答應。
到來真果日，下晝再問一次，矮仔都話OK，約好夜晚先出去食飯，食完飯，十點幾，新郎哥埋左單話起行之際，矮仔先至突然話佢女友屋企有白事，唔係幾方便…！
以下係本人心諗：嘩！有冇搞錯呀﹖就算佢女友屋企人係當日出事，都已經係食飯之前知道啦，咁直接講咪得o羅！應承人做唔到，仲要出來食埋人餐飯！有冇cheap D呀﹖！
新郎哥到好後期先諗到「食埋人餐飯咁cheap」，因為當時真係六神無主，以為坐埋矮仔架車走（佢屋企樓下冇位泊車），特登冇渣車出來，兩條友，一人只有一袋衫褲，男司儀住西貢，坐得車去都唔休息得幾耐（新郎哥住元朗），於是就即刻打電話同老婆講，拿permit去深圳搵間按摩院訓一晚。而老婆當然好傳統咁（正常都要）打番電話俾矮仔，叫佢同女友都唔好來飲，唔想衝撞。（其實，我估佢地去飲的話，會持住自己好熟，唔俾人情…）
第二日，人地女友send左個短訊來，話因為佢有「怪病」，佢男友唔想俾人見到先至會講大話…云云（新郎哥因為嬲得滯，睇過下就delete左，只係就得咁上下）…
以下又係本人心諗：下﹖怪病﹖唔係一早就知有架咩﹖係要食完人地餐飯、擺埋酒先至有﹖
男司儀揣測，係因為矮仔佢地剛剛決定結婚，間屋要是但做男家或者女家，怕衝撞（聽講白紅、紅紅都要避忌），佢女友唔鍾意，或者，佢女友唔鍾意突然有兩條麻甩佬上來屋企訓（車…以新郎哥同男司儀對妳o既評語，妳唔著都唔駛驚啦…）。
自果日起，新郎哥同男司儀就決定同矮仔絕交喇，而老婆大人都好讚成，因為新郎哥過往實在俾矮仔搵左無數咁多次笨seven。
事件已經過左十幾日，新郎哥都仲放緊假，據我所知，矮仔打過一兩次電話俾新郎哥，但係都俾人以各種理由收線（當然佢地同我講果時我一定會加句「哽係搵你幫佢XX啦」，而老婆大人都周時搭咀落幾両鹽同醋）。
呢件事，我拿左半個permit（即係新郎哥唔反對，其實佢話得俾我知，就係「預左」我講出去），向同事講番出來，各人評語：呢D咪係好兄弟o羅！
好事‧好事
今年真係好多人結婚！
我前前男友（即係生得都幾矮、浪費左我年幾青春、搬走左唔向銀行改地址、欠落週身債、搞到我成日收到佢D追數信同追數電話、我當年搬去同佢住蝕左萬幾蚊但係佢搬走又問我拿番幾千蚊按金上期果個）都傳出喜訊！
話說佢識左個女友，我未見過，但係D朋友講番，真係繞口又槮手…樣唔靚又冇身材…不過，人地鍾意就得啦，我理得佢丫！
果位女友任職出入口（走水貨），有次俾人拉過之後就冇做，失業，前前男友就好豪咁話養起佢喎，之但係女友話「你好似仲有卡數喎…」，一計落條數仲差十幾萬！咁女友見對方「咁有誠意」，就好識做咁賣左自己層樓，執到十幾廿萬，俾左錢前前男友找卡數（有人講係十七萬，有人話唔止），就早一兩個月之前之麻（但係我而家仲收到佢o既追數信…），之前前前男友就週圍同人講話買車、買Benz、一次過俾錢（其實係之前供車成日斷供，紀錄唔好，俾人blacklist左），每個月儲到五千蚊，過一陣就買到，睇緊車啦…下年二月結婚！
嘩！恭喜晒！恭喜晒佢嫁人，仲咁早就收到禮金！
大家都要恭喜我！恭喜我有啖笑！
有好幾個朋友已經講明唔去，有兩個仲話絕交添架喇（唔係因為我，純綷係佢地私人恩怨，絕交果兩個就聽住先啦，起碼都絕一頭半個月掛）…
Sunday, December 09, 2007
台灣遊——序
台灣四天三晚遊在抵返港晚食後圓滿結束。
特別鳴謝台灣朋友珊珊，客串導遊兼三陪（陪玩、陪吃、陪傻）女郎！
這趟旅行發生了很多為一次，包括：
‧第一次體力消耗那麼大——同行朋友都很喜歡逛，也很傻，一個拍照要一次正經一次玩的…。
‧第一次玩得那麼瘋——同上。
‧第一次用錢那麼多——沒有男友同行，什麼都自己付，也因為連續不停的逛街，看到吃的要買、看到手信要買、看到想買都要買的關係。
‧第一次發胖那麼利害——同上。
‧第一次回程時行李那麼重——同上。
===========================
先看帶回來的東西
書想還買很多……
琴譜$62.5（很貴，但香港很難找，想多買幾本，但只有這一本是「台灣版」，其他的更加貴）、六弄咖啡館$46.75、反自殺俱樂部$43.45（這兩本打折後應該不能再便宜的了）、艾莉森I$50（因為在香港買一樣價錢，買一本就算，到現在也覺得自己笨…）莉莉亞&特雷茲I、II和III@$50（是比較便宜一點，有六本的，但太重了，只能先買三本）是自己的書；學園奇諾、櫻欄高中男公關部10和11是幫人買的，下面一本包著的是幫人家帶來送人的。
吃的也想再買多一些……只是沒有錢了。
有麥皮沖劑X2、仙草燒沖劑、藍莓茶沖劑、沖劑試飲小包（共$212，現在覺得貴了）、肉燥X2@$30（是貴了一點，但送禮還可以接受）、香腸X2@$50（很好吃的，可能很久以後才會再吃到，所以就買了）、梅粉$2X（希望會比香港買到的好）、朱古力味煙$22.5（送吸煙朋友，算差不多）、魚蘇和蝦蘇@$25（香港買到其他牌子，還便宜一點，旅遊時的衝動是不可看小呢……）……還有
鳳梨蘇X2@$45（好貴啊！有人「「指名」要吃，對我來說，比當初指名要吃鴨舌已經便宜很多了。）是自己買的，水果蘇是珊珊硬送我的，其餘三大盒是珊珊托我帶回來送她朋友的。還有兩小包八仙果@$32.5（超貴！我大既不會送給別人。）和四小盒麻薯Q@$7.5（應該再多買點）在友人行李裏。
衣服也是今次主攻：
上衣X3（共$270，灰色的冷衫是一般價錢，另外兩件T恤是超平！）、帽子X2（共$190，比香港買便宜一點點。）、銀包$150（因為想要換一個，這個價錢還可以不很後悔。）、襪X8（共$75，抵到爛）……
這兩對耳環相信香港也有，不過見到價錢合理（共$100），所買了。珊珊還硬送我一個小手袋（下次補拍）呢！
當然還有一些很小「精品」：
小紙立體砌圖X5、大紙立體砌圖X2（都忘記了價錢）、陶笛X2@$25和筆記本（見到突然想買，不知道付了多小…總知不是很貴就是了）。
應該沒有漏罷。這樣就花了一千八百多元。
Tuesday, December 04, 2007
好事壞事
早幾日個電腦凍親，連續好多日都開唔到，今日暖番，心思思試下，佢突然又開得番……orz
開得番哽係即時要向台灣朋友報告出發日期，開著個MSN，一個老朋友突然online，與其講老朋友，不如講舊情人，我同佢中六拍過拖，佢因為要準備高考要分手，我無奈之餘，心裏面都留左個烙印，都花左好多時間去唔再成日諗，但係過左好多年之後，都係每次見到佢、提起佢，甚至見番以前D同學，心裏面都有「有D野」o既感覺，可能係我仲有所期待掛。
不過，佢剛剛同我講，原來佢兩年前已經結左婚喇，女友係前工司同事，美國回流（應該係掛），而家返左美國定居，老朋友剛剛都過埋去。
我年幾前見佢，佢都仲係單身咁o既樣，又話冇拖拍，原來冇女友唔等於冇老婆。
當知道佢結左婚，個心都突然沉左一下，我以後都唔可以再「有D野」咁o既心情喇……邊個叫我當年咁easy let go﹖冇得計。
Tuesday, November 27, 2007
炒車
第二次炒車，第一次係坐公司客貨車，慢車被人推尾，好少事。
今次比較慘，我朋友架車慘、我同事更慘……
幫新婚同事兼朋友度上婚宴台詞，順便坐佢車返屋企，途中撞到另一個同事渣電單車收工，同路，去到一個落斜位突然一部私家車偷小路位掉頭（明明再落幾十米就有迴旋處可以掉頭），小路出大路都唔讓車，新婚朋友收唔切撞埋私家車度，電單車同事跟住撞埋我地尾，腳傷，又撞到心口背脊，爬響路邊不停叫痛，私家車退後仲想走添，新婚朋友即刻跑落車欄住佢！我呆再十幾秒，新婚朋友叫左兩次我先至識打電話同落車睇。
夾手夾腳同新婚朋友將電單車同事托上擔架床上白車，對頭個司機突然猛話唔舒服，丟低女友（明明女友話唔舒服先，想上白車先），跳上白車諗住唔吹波波（我係好懷疑佢有飲酒）……
搞左一輪，我口供都唔駛落就走得。好彩公司叫個通宵同事來影幾張相，我有幸有車坐返屋企（欠債前男友到場車新婚朋友走，我本來諗住會叫的士）。
電單車同事要轉院，可能幾嚴重，新婚朋友有少少頭暈但唔駛睇醫生，佢架車車頭爛左，但係應該唔駛total loss，我就起初勒到心口一陣之後冇事，過左大半個鐘先發現頸同肚有少少痛同作嘔，不過睇醫生的話真係天光都未必返得到屋企，都係唔睇喇。今次件事唔係話十分嚴重（以出新聞角度），但係響自己眼前發生，都好唔安樂。
Thursday, November 22, 2007
又係大閘蟹
先前一為身體不好，一直都沒有精神上網，我知道我應該先寫影評，不過我實在很想很想先寫大閘蟹。因為，今天我去吃了今年（應該會是）最後一次大閘蟹。
某要好同事今個月只有兩天平日假期，當中只有一日和我同日，就約了這天，加上一個早更同事，一個前同事。四個人兩個住屯門，一個住洪水橋，又「最近」是屯門有那酒家，教完琴之後就極速跳上巴士。
因為去到已經八點多，加上之前走太多路，坐下就不停的吃啊吃…到最後吃下七隻蟹（以記憶推斷，應該是七隻），另外兩個人好想吃其他東西，叫了酥皮雞和乜乜豆腐（忘記了），也吃了幾口。
十一時才吃完，飽到不行，真的「利都損晒」。不過，可能是「水尾」的關係，蟹都不太肥，膏不像早前吃的多，但我都很滿足了。
Friday, November 09, 2007
《鐵三角》
約左小安，本來想去睇《夏天的尾巴》，上網明明仲話今日做緊，點知去到佢又話落左！唯有睇過第二齣，左揀右揀，揀左《鐵三角》，本人對呢幾個導演冇乜特別欣賞唔欣賞，演員之中，古天樂算係幾鍾意睇（至少靚仔丫）。
齣戲所有角色，響一開頭就幾乎即刻出現晒。三個有壓力未解決又等錢用o既麻甩佬：一個貪威識食的士佬、一個過氣車手、一個炒燶股票古董舖老細+前軍人。車手因為太愛死鬼前妻，新老婆同前任極似樣但係mental，終日自我妄想，搭上貪錢死差佬。的士佬想食大茶飯，先搭差佬後搭過江龍大佬。
三個麻甩一開場只係相識一場，因為同是天崖淪落人走埋一齊，一齊撞到「高人」，留低塊金片話想搵錢搵佢咁喎，當知道塊金片有料到，「高人」就死鬼左，但係又留低條線叫三個去尋寶。的士佬大茶飯冇着落，兩頭唔到岸，仲漏左口風俾差佬知自己去尋寶，諗住食兩邊夾棍尤得大佬同差佬私片又唔成功，加上老婆mental得好正常幫差佬一腳，寶物到手，卻有差佬釣住尾。
買家出現以為發大達，點知差佬踩上門，車手一早知佢同老婆有路，反客為主，鎖住差佬又叫老婆對質，諗住同佢地一鑊熟啦，老婆又突然對差佬反面無情。中間兩個仲未義結金蘭o既兄弟殺到，玩左兩下內哄，俾差佬誤打誤撞搶左件寶，老婆差o的俾佢車死！
都不過幾分鐘，兄弟又講和，開開下車又俾佢地見番差佬！今次玩鬥智調包，點知一個白背心膠袋裏面裝住o的重野人人都有一袋，差佬袋住寶物、麻甩袋住清潔濟胸圍、大佬袋住錢o黎咁賣家買黑星再加傻佬袋住一大包fing頭！呢個時候，呢一part先至出場果條軍裝好奇追車，點知撞破晒，突然全世界進入混戰，報仇出氣之餘仲要顧住搶寶物。麻甩搶番件寶又點﹖帶住條女陀手lung腳，四個人又只有一支槍，唯有放棄件寶。最後，軍裝執到寶，突然槍法如神，將大佬、黑星賣家同差佬搞掂晒。班麻甩完全置身事外，辛苦一大餐到頭來都係由頭再開始。
頭三分一，真係悶到好想介櫈！一o的緊張都冇！三條麻甩好順理成章咁團結，都唔知為乜，不過做戲啫，冇所謂啦。要俾隻差佬可以專心奪寶，先令到佢窮途沒路係好合理，但係做多左野lor。
中間三分一，開始有o的o黎料，突顯到的士佬有幾行唔成蠱惑，同埋車手可以有幾車手，之但係略嫌動作場面唔夠利落，古董佬o的軍人味都仲未出到。
尾三分一，完全黑色幽默，壞人死晒，麻甩空手而回，凈低正直軍裝好似係贏家咁（我認為老婆撞到正常番搣甩左差佬又同老公好番先至係大贏家！），有少少似《瘋狂的石頭》咁，人地都係壞人死晒，但係佢做到「all贏」喎，係計我話，呢齣片都可以玩「all贏」，寶物其實有三件，冇左最貴左件，另外兩件都仲值少少錢丫，起碼可以解決到三個人o既燃眉之急，不過導演最後係想佢地三個「撞鬼」，冇法啦。另外，呢一段有條鱷魚出現，佢完全係用o黎擾亂觀聚思緒，等你睇到結局果時會有一種：「哦，原來個結局係咁出人意表o既~。」（注：請以機械人式語氣讀出，句尾音節稍為拉長上揚）
Tuesday, November 06, 2007
大閘蟹
終於捱過左最早起o既星期日！放工返到屋企，打開電視機之後，就立即準備我期待已久o既「自私自利獨食大閘蟹宴」！
又洗又擦，煲水磨薑…攪左差唔多成個鐘先至有得食。
食落，同我去客家好棧食差唔多嘥屎，一個隻腳長少少，另一個隻腳肥少少，食到個身，唉！好後悔去俾錢買！鬼咁少膏，又唔夠香口！
即刻蒸埋第二隻，都係差唔多……嗚…我嘥左錢……欲哭無淚……
食完之後，即時決定來緊例假再去食十蚊蟹！溫馨提示：蟹響加連威老道某間「大閘蟹專門店」買，$35公果種，睇網上食評，有買過$200幾蚊隻同$40蚊隻o既人都讚，都唔知我黑仔定係太夜去/買得太平人地洽我……
Saturday, November 03, 2007
對不起呢，BB！
昨夜寫blog寫到天昏地暗，看看鐘赫然發現是凌晨四點！即時準備去睡！但一進房又赫然發現床上堆滿待摺的衣服。摺好衣服又到收藏的問題…把心一橫，就先執拾個抽屉再說，將床下的一格拿出不穿的衣服，放好還穿的進去，來回雜物房幾次，再洗把臉、擦擦牙…之後，五時了，終於可以睡了。
在床上轉了幾個身之後，發現BB沒有像平常一樣鑽進來，就輕聲的叫了幾聲，沒有出現是正常，因為BB還沒學會記住自己的名字，但忽然床板在下面被撞了一下，即時打開抽屉，伸手進去，有件會動的東西！再摸摸，暖暖的，就知道是BB，半推半就的把她拉了出來。她大概被困半個小時以上了。
BB出來之後，好似失憶一樣，不知道往那裏走，鑽這鑽那的，好不安的樣子，我把她抱起，她不停的要舔我的手，平時叫她停她都不會再舔，但是這次就像餓了很久似的，不停在舔…我像平常一樣放進被子裏，可是一蓋上被她就跑出來，再放她又跑…後來我就忍著冷讓她的頭晒月光（隔鄰的燈光），她才乖乖的伏下。
好可憐呢…！我忍不住哭出來了…
BB，我以後會關好抽屉才走開。
Friday, November 02, 2007
大閘蟹
自從某年吃過大閘蟹之後，舌頭就被它的豐腴金黃的油膏緊緊抓住…（那是太過份了罷。）不過，真的是，吃著無法抗拒，過後又回味不斷，只好不絕地再番尋味。
今年終於吃了第一次大閘蟹！去「客家好棧」吃。那是因為同事介紹，網上食評又很讚，所以就去吃了。
十元一隻細蟹，包薑茶，有蟹剪蟹籤提供，有人為你蒸煮，不用洗碗，不用點套餐，不用點滿特定金額，沒有限定數量，有AIG信用卡還有九折（兼有八款特價$28小菜），只要九時前點菜，吃到打烊，還想什麼﹖去吃就是了！
跟友人去吃，每人三隻蟹，兩個小菜，一碗飯（因為有人怕菜涼，硬要吃完蟹才點小菜，點不到特價小菜，害我吃貴菜），我吃完飽到可以即時去參見「周教主」，九折買單，七時半入坐十時多離開，一百四十多元。哪裏找﹖
那裏的蟹是來自固X湖（忘記了），都不知道是哪裏，但陽澄湖、太湖…福建都有出產，那麼，哪裏的大閘蟹還不都是大閘蟹﹖最重要是食味，蟹肉無論是那種尺碼（當然，我還未吃過二百元一隻的蟹）都差不多，之前吃七十元一隻的，肉是會甜一點，也不差太遠，但不要忘記：今次吃的是十元一隻；到蟹膏，每隻都很夠，又夠香，三隻中其中一隻是爆膏的，再跟七十元一隻的比較：膏不是都依比例的在肚中間嘛﹖十元是很超值了！當然你追求味道上、銀碼上、口碑上、虛榮上…的滿足，就另當別論，但我可以跟你說：我到現在，湧出來的胃氣還有蟹膏的香味。還有，薑茶加了杞子和圓肉，看上來矜貴一點，沒有很特別的味道，只能說：很薑。
下個星期想吃多次呢！回家路上，特地繞到蟹店，買了兩隻大一點的蟹，$35一隻，希望不會失望。
要注意的是：訂位只能訂六時半和八時半兩個時間，我訂到七時十五分的枱（可能是因為還有很多吉枱，但電話中的小姐硬說不可以訂七時半，要我訂早十五分鐘）；若然時間上沒有走棧，可以請他留蟹（但一般都不會售罄，我去尖沙咀吃，入坐時還有三分一吉枱，很多人都是吃小菜）；蟹剪蟹籤可能因為少，所以要叫才有，又因為傳菜阿姐不會記住誰人點過蟹，所以薑茶要提他們；供應時間是晚市平日六時半至九時，過時或其他日子$20一隻。
Thursday, October 25, 2007
造飯
很久沒有自己造飯了，前一段日子實在沒有精神、沒有動力@.@。
近來算是好了點，也開始覺得不可以每日頽頽廢廢地過，也要盡量省點錢過冬。
冬天，太多意外了，學生測驗/考試、舊同/學舊同事/舊朋友約出來吃飯、突然發現衣服被蟲蛀了個大洞/發黃變色洗不掉（是已經發現了）…忙來忙去，總是這些時候失去預算/計錯預算，加上今年太多人結婚，「認識」了幾年的同事送帖過來，不去還得送禮（好想找個借口不送），剛剛才認識的同事又嚷著要我去（正在計劃如何可以付得最少、甚至不用送禮），還有些不常常找我的（我打算不理了，到他們很厚臉皮的送帖來才算罷）…計到十二月的花紅為什麼要等到農曆新年才發﹖ 囧rz
難得兼職早收（實情是有人「太忙」不能上課），皮膚這裏那裏都裂開來了，即時去買點潤膚露，都不敢去買比較貴的（雖然很好用），折扣卡/積分卡全部沒有帶出來，就試試一些「中價貨」（不會塗得一身生果味/人造香味的就是了），去了無印（因為只有用那裏的潤膚油不會出紅疹，但比「莊先生」的貴幾倍T_T）。
之後，一直在逛，看到一些好可愛的長襪子，五十元不到，正想買一對哄一下自己的時候，突然收到電話，有學生考試要停兩課……
那時才八點，肉赤得我即時離開商場坐車回家，中途繞過去超市買了些餸菜，今晚、明日、後日，都吃自己煮的！
現在回想起來，覺得有點衝動，但也希望偶爾為之真的可以省到錢，那怕是一點點，如果真的可以落實每天都做就最好了。
Wednesday, October 24, 2007
需要休息
昨晚突然心緒不寧，造了很長的夢，夢到很多人和事，整個夢都在來來往往、匆匆忙忙的，沒睡得好，早上還因為夢裏太匆忙而醒了。
今日全日都不在狀態，幸好能給我瞞混過去。
明天跟同事調假，兼職之後還是回家休息好了。